सोलुखुम्बु । थुलुङ दूधकोशी गाउँपालिकामा मा बृहत कवि गोष्ठी सम्पन्न भएको छ । गोष्ठी तथा कविता प्रतियोगितामा सोलुदुधकुण्ड नगरपालिका–११ का शम्भु निशब्द प्रथम भएका छन् ।

सोलुखुम्बुमा नै पहिलो पटक गठन भएको थुलुङदुधकोशी प्रज्ञा प्रतिष्ठानद्वारा आयोजित बृहत् कवि गोष्ठी तथा जिल्ला स्तरीय कविता प्रतियोगितामा लेखनाथ कटेल दोस्रो र निर्मला बस्नेत तेस्रो भएका छन् । प्रतियोगितामा प्रथम स्थान प्राप्त गर्नेले ३० हजार रुपैयाँ नगदसहित प्रमाणपत्र, द्वितीयले २० हजार, तृतीयले १५ हजार रुपैयाँ प्राप्त गरेका छन् ।

प्रतियोगितामा ६२ जना कविको सहभागिता रहेको थुलुङ दुधकोशी प्रज्ञा प्रतिष्ठानका अध्यक्ष सुवास सङ्गम राईले जानकारी दिए । ग्रामीण क्षेत्रका प्रतिभालाई अवसर प्रदान गर्न प्रतियोगिताको आयोजना गरिएको उनको भनाइ छ ।

गोष्ठीका प्रमुख अतिथि तथा थुलुङदुधकोशी गाउँपालिकाका अध्यक्ष असिम राईले स्थानीयस्तरमा रहेका प्रतिभा प्रस्फुटन गर्ने यस्ता खालका प्रोत्साहनमूलक कार्यक्रम निरन्तर रूपमा गर्ने बताए ।