काठमाडौं — युवा हास्य कलाकार रुपेश रेग्मीले यस वर्षको गाईजात्रामा आक्रोश र व्यंग्यको धारिलो मिश्रण दर्शकसामु पेस गरेका छन्। सामाजिक र राजनीतिक विकृति–विसंगतिविरुद्ध आफ्नो स्वर सधैं निर्भीक रूपमा प्रस्तुत गर्दै आएका रेग्मीले ‘गाईजात्रा २०८२ विशेष झटारो’ शीर्षकमा नयाँ प्रस्तुति यूट्युबमार्फत सार्वजनिक गरेका हुन्।

साढे १३ मिनेट लामो यस भिडियोमा उनले वाचन, अभिनय र कवितात्मक शैली प्रयोग गर्दै देशमा फैलिएका भ्रष्टाचार, सीमासम्बन्धी विवाद, जनजीवनका समस्या र युवामाझ फैलिएको निराशाप्रति तीखो टिप्पणी गरेका छन्। “३३ किलो सुन खोइ?”, “महाकाली खै?”, “टाउकोमा हेल्मेट खै?” जस्ता शीर्षकमार्फत उनले तात्कालिक मुद्दालाई व्यंग्यात्मक तरिकाले उठाएका छन्।

यो गाईजात्रे विशेष सामग्रीको लेखन र निर्देशन स्वयं रेग्मीले गरेका हुन्। छायांकन जितेन्द्र खड्काले र सम्पादन अश्विन अधिकारीले गरेका छन्। रोजन तामाङ, अनिश खड्का, यूनिक भट्ट, अभियान लम्साल, सिम्पल देवकोटा लगायतका कलाकारले अभिनयमा साथ दिएका छन्। वरिष्ठ व्यंग्यकार शैलेन्द्र सिम्खडाप्रति विशेष आभार व्यक्त गर्दै रेग्मीले देशको हालतबारे दर्शकलाई सोच्न बाध्य पार्ने प्रस्तुति दिएका छन्।