काठमाडौं : नेपाली चलचित्र ‘चमेलीको पोई’को फर्स्टलुक पोस्टर सार्वजनिक गरिएको छ । बुधवार नारायणथानमा एक कार्यक्रम आयोजना गर्दै सिनेमाको तीन पोस्टर सार्वजनिक गरेको हो ।

तीन वटा पोस्टर मध्ये एकमा अभिनेत्री सुरक्षा पन्तले अभिनेता मुकुन भुसालको खुट्टा तान्दै गरेकी छन् । अर्को एक पोस्टरमा सुरक्षाले बन्दुक भिरेकी छन् भने मुकुनले एक हातमा ठेकी र अर्को हातमा गुलावको फूल लिएका छन् । अर्को एक पोस्टरमा भने सिनेमाका सबै जसो कलाकार अटाएका छन् । सोही पोस्टरमा मुकुनले सुरक्षाको गोडा मिच्दै गरेको देखिन्छ । सार्वजनिक पोस्टरहरु हेर्दा सिनेमा कमेडी र सस्पेन्सले भरिएको लाग्दछ ।

एभरेष्ट सूर्य बोहराको निर्देशनमा बनेको सिनेमामा मुकुन, सुरक्षाका साथमा नारायण त्रिपाठी, विल्सन विक्रम राई, रविन्द्र झा, प्रेम देव गिरी, राम नारायण उपाध्याय, गणेश गौतम, अंसु महर्जन, बबिन राई, खड्ग बहादुर पुन, उमेश राई, रजनी गुरुङ, सुनीता सापकोटा, मिना आरएल शाही, रितु मल्ल ठकुरी लगायतले अभिनय गरेका छन् ।

सिनेमाको पटकथा र संवाद शिवम् अधिकारीले लेखेका हुन् ।धन लक्ष्मी सिने मेकर्सको प्रस्तुतिमा बनेको सिनेमामा सुनिता सापकोटा र राम नारायण उपाध्यायले लगानी गरेका छन् । उदय विक्रम राणा र रितु मल्ल ठकुरी कार्यकारी निर्माता रहेको सिनेमाको लाइन प्रोड्युसर धनकुमारी श्रेष्ठ बोहरा रहेका छन्।

सिनेमाको सह-निर्मातामा यम ओली, सुदिप कुँवर, सुमित्रा थापा, नारायण त्रिपाठी, कपिल आचार्य, प्रदिपकुमार सापकोटा छन् । शेर बहादुर तामाङले छायांकन गरेको सिनेमामा बन्दे साह र सुजन वडालको सम्पादन, राजनराज सिवाकोटीको संगीत,कविराज गहतराजको कोरियोग्राफी, कुमार महर्जनको एक्सन छ । रामनवमीको अवसर पारेर चैत १३ गतेलाई प्रदर्शन मिति घोषणा गरिएको सिनेमाको वितरण आरआर फिल्म्सले गर्नेछ ।