काठमाडौं । ‘करुणा ले जोड्छ’ भन्ने मूल नाराका साथ नेपाल शाकाहारी संघले आयोजना गर्न लागेको ‘अहिंसा महोत्सव नेपाल २०८२’ आगामी भदौ १२, १३ र १४ (August 28–30, 2025) मा नेपाल पुलिस क्लब, प्रदर्शनी मार्ग, काठमाडौंमा भव्य रूपमा सम्पन्न हुने भएको छ।

यस तीनदिने सांस्कृतिक महोत्सवको उद्देश्य करुणा र अहिंसाको भावना फैलाउँदै शाकाहारी र भीगन जीवनशैलीको आम स्वीकार्यता बढाउनु हो।

महोत्सवले विद्यालयहरूसँग सहकार्य, भावी पुस्तामा जनावर अधिकारबारे चेतना, र शाकाहारी–भेगन व्यवसायहरूलाई सम्भावित ग्राहकहरूसम्म पुर्‍याउने अवसर पनि प्रदान गर्नेछ।

संघका अध्यक्ष कृष्ण गुरुङका अनुसार, “हामी शाकाहारी, जनावर–अधिकारवादी, वातावरणवादी र करुणावादीहरू जो-जो जहाँबाट भए पनि एउटै मान्यता साझा गर्छौं – त्यो हो करुणा काम र विधि फरक होला, तर मन्त्र एउटै हो – करुणा।”

महोत्सवले मासुजन्य उपभोग गर्ने व्यक्तिहरूलाई पनि व्यवहारिक र सहज वैकल्पिक जीवनशैलीको सम्भावना देखाउने प्रयास गर्नेछ।

भेगन के हो?

भेगन(Vegan) जीवनशैली भनेको कुनै पनि जनावरजन्य उत्पादन—

जस्तै मासु, दूध, अण्डा, मह, छाला, ऊन आदि—को प्रयोग नगर्ने
दृष्टिकोण हो।

यसले जनावरमाथिको हिंसा घटाउने, व्यक्तिगत स्वास्थ्य सुधार गर्ने, र जलवायु परिवर्तनको असर न्यूनीकरण गर्न मद्दत पुर्‍याउँछ।

भेगन जीवनशैली अपनाउनेलाई भेगन व्यक्ति भनिन्छ।

महोत्सवका प्रमुख आकर्षणहरू: प्यानल छलफल र कार्यशालाहरू (विशेषज्ञहरूद्वारा),संगीतिक प्रस्तुतीहरू (कलाकारहरूको साथ),योग अभ्यास र अभ्यन्ताहरूसँग अन्तरक्रिया,गोलमेच बैठक र राजनीतिक संवाद,शाकाहारी तथा भेगन खानाका ६०+ स्टलहरू

जनावर अधिकारबारे सचेतनामूलक कार्यक्रमहरू,विद्यालयका विद्यार्थी लक्षित प्रेरणादायी सत्रहरू,स्थानीय तथा अन्तर्राष्ट्रिय अतिथिहरूसँग साक्षात्कार

यो महोत्सव सबै वर्ग, धर्म, उमेर र संस्कृतिका व्यक्तिहरूका लागि खुला रहनेछ।शरीर, मन र आत्माको सहअस्तित्वलाई सम्मान गर्दै ‘अहिंसा महोत्सव’*ले नेपाली समाजमा करुणा, स्वास्थ्यप्रद जीवनशैली, सहिष्णुता र परस्पर आदरको संस्कार विकास गर्ने लक्ष्य राखेको छ।