शिक्षक आन्दोलनका कारण सामुदायिक विद्यालयको पढाइमा परेको असरका कारण ताप्लेजुङको फक्ताङलुङ गाउँपालिकाले शैक्षिक क्यालेन्डरमा भएको मिन पचासको वर्षे बिदालाई घटाउने भएको छ ।

गाउँ शिक्षा समिति तथा पालिकामा रहेका विद्यालयका प्रधानाध्यापकहरूको संयुक्त बैठकले निर्णय गरेको पालिका अध्यक्ष राजन लिम्बू(मुक्ति)ले जानकारी दिए ।

शैक्षिक क्यालेन्डरमा भएको मिन पचासको बर्षे बिदालाई असार मसान्तसम्म घटाउने र वर्षा यामको मौसमलाई मध्यनजर गरी शिक्षा शाखाबाट सूचना जारी भए पश्चात् मात्र विद्यालय बिदा गर्ने निर्णय भएको शिक्षा समितिका अध्यक्ष समेत रहेका पालिका अध्यक्ष लिम्बूले जानकारी दिए । आन्दोलनका कारण विद्यालयको पढाइमा भएको असर भरण गर्न दसैँ–तिहार पश्चताका सार्वजनिक बिदाका दिनहरूमा समेत पठनपाठन सञ्चालन गर्ने सहमति बनेको पालिकाले जनाएको छ ।

पालिकाले शैक्षिक सत्र २०८२ देखि कक्षा ४ देखि माथिका हरेक कक्षाको हरेक बिषयमा विद्यार्थी सफल हुने दर कम्तीमा ६५ प्रतिशत हुनुपर्ने लक्ष्य निर्धारण गरेको छ । पालिकाले शैक्षिक सत्र २०८२ देखि सर्वोत्कृष्ट सिकाई उपलब्धि हासिल गर्ने शिक्षकलाई सम्मान तथा सबैभन्दा कम सिकाई उपलब्धि हासिल गर्ने विद्यालय तथा विषय शिक्षकलाई दण्ड स्वरूप पहिलो चरणमा सामाजिक सञ्जालमा नाम सार्वजनिक गर्ने निर्णय समेत गरेको छ ।