रुपन्देही । सिद्धार्थनगर नगरपालिकालाई पूर्ण संस्थागत प्रसूति सेवायुक्त, पूर्ण खोप सुनिश्चित तथा दिगोपन नगरपालिका घोषणा गरिएको छ। मगंलबार एक कार्यक्रमबिच नगर प्रमुख एवं संविधानसभा सदस्य इस्तियाक अहमद खाले नगरपालिकालाई पूर्ण संस्थागत प्रसूति र खोप दिगोपना सुनिश्चित घोषणा गरेका हुन्।

कार्यक्रममा बोल्दै जिल्ला समन्वय समिति रुपन्देहीका प्रमुख एवं जिल्ला खोप समन्वय समितिका अध्यक्ष उमाकान्त चपाईंले पूर्ण संस्थागत प्रसूति र खोप सुनिश्चित दिगोपना घोषणाका लागि खट्ने स्वास्थ्यकर्मी र महिला स्वास्थ्य स्वयंसेविका धन्यवादको पात्र भएको बताए। महिला स्वास्थ्य स्वयंसेविकाको सेवासुविधा बढाउने कुरामा पालिका सकारात्मक रहेको उनको भनाइ थियो।

स्वास्थ्य कार्यालय रुपन्देहीका निमित्त प्रमुख चिन्तामणि ज्ञवालीले खोप लगाउन पाउनु बालबालिकाको अधिकार भएको बताए। प्रमुख प्रशासकीय अधिकृत जनक थापाले सबैको मिहिनेत र सहयोगले सिद्धार्थनगरलाई पूर्ण संस्थागत प्रसूति र खोप सुनिश्चितता दिगोपना घोषणा गर्न सफल भएको बताए।

पूर्ण खोपयुक्त पालिका सुनिश्चित गर्ने कार्यविधि राष्ट्रिय निर्देशिकाबमोजिम सम्पूर्ण प्रक्रियाहरू पूरा गरी सिद्धार्थनगरले पूर्ण संस्थागत प्रसूति र खोप सुनिश्चित दिगोपना घोषणाका लागि १६ देखि ५९ महिनासम्मका सबै बालबालिकाहरूलाई सबै खोप दिलाई पूर्ण खोप पाएको सुनिश्चित गरिएको स्वास्थ्य शाखा प्रमुख ईश्वरी न्यौपानेले जानकारी दिए।